نصيحة ديكتاتور

منذ شهر تقريبا تم اعدام الرئيس المخلوع أو (الراحل) صدام حسين واتقال حاجات كتير بعد اعدمه في ناس قالت انه شهيد لانه قال لا اله الا الله محمد رسول الله , وفي ناس قالت انه بطل زي جيفارا ,وفي اللي قال انه زعيم محارب زي عمر المختار.

و علي النقيض تماما اللي قال انه انتحر وانه مش شهيد لان فرعون قال امنت انه لا اله الا الذي امنت به بنو اسرائيل و قال كمان وانا من المسلمين ومع ذلك فهو في الدرك الاسفل من النار ,وفي اللي قال انه عميل و باع نفسه للامريكان من قبل ولما حب يتنطط عليهم خلعوه عشان يكون عبره لغيره من الحكام ,وفي اللي قال انه كان طاغيه وظالم وكان معذب شعبه .

بصرف النظرعن الاقاويل الكتير, صدام مات و راح عند اللي خلقه ان شاء عذبه وان شاء غفر له لكن احنا عاوزين نستفيد من اللي حصل ده هل كل ديكتاتور نسيبه لحد ما يجي غرنا يحتلنا بدعوى التحرير,

انا قعت افكر كتير ولقيت ان احنا لو متحركناش ضد اي ظلم او قهر او طغيان مفيش اللي هيجي يحررنا ببلاش وانه مش هيجي عشان خاطر سواد عيونا اكيد هيجي اولا عشان خاطر مصلحته ثانيا وعاشرا ,

كنت بتفرج علي التليفجن وكانت اخر حته في مسرحية كارمن لمحمد صبحي وانا من العاشقين له وكان بيقول كلام جميل جدا جداوتخيلت الكلام ده اللي بيقوله صدام حسين قبل مايموت

تخيلوا كارمن مش انها الشخصيه ولكن علي انها اي شئ ........................

انا ديكتاتور ! دنا ديكتاتور لسه في حضانه بتعلم اول حروف القهر والاهانه

سيبين الكون بحاله بظلمه وبظلامه

وجين عليا انا وتقولولي ديكتاتور وظلمت الانسانيه

كارمن قالتلي لأه وانا نويت ليلتها اقتل البنت ديه قتل ملوهش ديه

يعني اقتل الحريه ......................ايوه قتلتها

طب انتوا عملتوا ايه ساكتين من بدري ليه مقلتوش لأه لييه

عشان انتوا مقلتوش طلعلنا قراقوش ومليون عفركوش ده غير اللي منعرفهوش

من كل شكل ولون

بالذمه انا ابقي مين فيي وسط دول انا ابقي مين في وسط دول

دنا ديكتاتور لسه بليه عند معلم كبييير هوه يقول وانا انفذ وانتوا ساكتين

دنا بتلكك بيكم وبتعكز عليكم وعشمان لسه فيكم ان انتوا تقولوا لأه

نفسي اسمعكوا مره تقولوا لأه قويه للديكتاتور اياه الكبير

قولوا لأه وانا معاكم قولوا لأه للامريككان والصهاينه ولعنف الاحتلال

قولوا لأه لكوبنهاجن وبلاش ذل وهوان

قولوا لأه وبلاش نفاق

اصرخ بعلو صوتك وانا هقول معاك

قولوا لأه للحروب ققولوا لأه للمجاعه قولوا لأه للتأمر قولوا لأه للخنوع قولوا لأه للخداع قولوا لأه للباع ولسسسسسسسسسه هيبيع

قولوا لأه والسلام

سلام