كنت بسمع برنامج العاشره مساءا علي قناة دريم الفضائيه وانا كنت واقف في المكتبه (المحل بتاع ابويا) بصور مستندات فكانوا بيناقشوا فكرة حركه كفايه خليك بالبيت و الفكره بوضوح هيه انها عاوزه تعمل عصيان مدني بشكل يبعد الناس عن عصيان الامن المركزي بمعني ان الناس تعمل اضراب و تعد في البيت وترفع علم مصر في البلاكونه يوم 23 يوليوكل ده مش هيبقي موضوعنا لكن موضوعي ان في شاب من الزباين اللي واقفين في المكتبه باين عليه انه غلبان ضحك باستهزاء وقال علم مصر فرد عليه راجل كبير برضه كان من الزباين وبرضه باين عليه متعشاش وأدي الواد محاضره في الانتماء بقي و العطاء والتضحيه وكلام كبير كده خلي الواد الغلبان في نص هدومه بصراحه انا دمي غلي وقررت اخش الحوار وسألت الراجل
ممكن اسأل حضرتك سؤال
قالي اتفضل
يعني ايه انتماء ؟
قالي يعني الولاء والعطاء و التضحيه
قولت جميل طيب الولاء ده بيجي منين؟
قالي يعني ايه
قولتله بمعني تاني انا ليه بيبقي عندي ولاء لابي وامي
قال عشان ربوك و صرفوا عليك
قولت جميل يبقي الانتماء مش معناه العطاء لكن معناه اني اخد الاول
الراجل ارتبك شويه وسكت وقال طيب انت مخدتش من البلد حاجه
قولت لأمخدتش واللي خدته دفعت قصاده كتير
قاللي التعليم المجاني
قولت تعليم ايه المجاني انا من اولي حضانه وانا باخد دروس لأني مبعرفش حاجه في المدرسه يبقي فين التعليم المجاني
وظل الحوار هوه يقول وانا ارد وموصلناش برضه لمعني محدد للانتماء
يعني ايه انتماء؟
7 comments:
السلام عليكم
ازيك ياأسامة ايه اخبارك
يعنى ايه انتماء ؟؟
تصدق فعلا هو يعنى ايه انتماء البلد ماتدناش حاجة بس احنا هنعمل ايه البلد محكومة وأسيرة فى يد من لا يرحم
من يوم مااتولدنا واحنا عايشين زى البلد بالظبط أسري ومش عارفين نعمل اى حاجة بحريتنا ولا ناخد حق ولا باطل
البلد كمان مخدتش حاجة عشان تدينا قصادها
البلد المفروض تاخد من اللى ماسكينها تاخد حقها عشان تقدر تدينا احنا كأبنائها
عشان البلد هى كمان يكون عندها انتماء
والله موضوعك جميل اوى
تحياتى الشديدة
الانتماء سيدي الفاضل هو انك تكون متجه و متوحد مع الشيء اللي سيادتك بتنتمي ليه مهما كان شيء ده و منهم طبعا الانتماء للوطن اللي انا مستغرب قولكوا ان احنا مخدناش حاجة مين قال يكفينا ان احنا عايشين على ارضه و اذا كان احنا بغبائنا احنا او اللي حاكمينها فديه مشكلتنا احنا مش مشكلة حد تاني انتماءنا لازم يكون للارض و للشعب على اختلاف الظروف و المشاكل اللي بتمر بيها البلد...الانتماء اكبر من احنا نتجنبه بسبب مشاكل كنا احنا السبب فيها من البداية و دلوقتي بنقول مخدناش حاجة من البلد..عموما مستني تعليقك يا سمسم..سلام
عاشقه الوطن اهلا بيكي انتي وشريف ارجوا انكم تكوني دايما بخير
هل انا ممكن انتمي للبلد لمجرد اني عايش علي ارضها اوحتي اتولدت فيها؟
لو لاحظتم الصوره اللي انا جايبها في البوست فيها واحد حاضن كلب وعلي حد علمي ان الكلب اكتر الحيوانات انتماء لصاحبه
لو صاحبه عامله بطريقه وحشه تفتكرواانه هيفضل معاه او يثور عليه ولا هيهرب منه حتي لو كان هوه اللي مربيه ومولود علي ايده
انا عارف ان فيه فرق لان الانسان ربنا كرمه عن باقي المخلوقات ولازم يكون له تصرف مختلف نتيجه لتفكيره بعقله
انا بصراحه مش عارف اقول حاجه تانيه وسعيد جدا لمشاركتكم
السلام عليكم
حلو حوارك جدا مع الراجل الكبير
بس للاسف هو معرفش يرد
ايوة طبعا لازم يكون فيه انتماء
لان انتمائى دا مش لازم يكون للحكومه او للنظام
لا انا بنتمى لبلدى
بنتمى لقعدة حلوة مع اصحابى اللى مش هنساهم اللى هما مصريين
بنتمى لنكته ضحكتنى طلعت من واحد مصرى دمه خفيف
بنتمى لكلمه طمنتى لما كنت متضايق جدا قالهالى عمى الكبير اللى هو مصرى
بنتمى لناس بتفكر عايشين بردة فى مصر فكرهم بيعجبنى
بنتمى لاكله ذرة كلتها على الكورنيش انا واصحابى بنتمى لبحر قعدت لوحدى اتفرج عليه واقول الحمد لله
بنتمى لايه ولا ايه بنتمى لكتير قوى
البلد يااسامه اكبر من انها تتمثل فى اشخاص معينين واكبر من انى اكرهها علشان تصرفات متعجبنيش لا بردة
البلد دى حاجة كبيرة قوى واسال اصحابك اللى مسافرين يقولك
البلد يعنى ايه
اتمنى تقولى رايك
على فكرة انا شفتك قبل كدة
انت معايا فى الكليه تقريبا
هبقى ازور مدونتك بقى
سلاااااااااااااام
اشكرك يا محمد انك بيينتلي صوره يمكن كنت شيفها لكن كانت مش واضحه
لانتماء زي منا قولت هوه عطاء بس ممكن ميكونش عطاء مادي بس لكن ممكن انه يكون عطاء من ناس عشت معاهم فرحت لفرحهم وحزنت لحزنهم لناس اتعلمت منهم وخدت منهم نصايح
عطاء من بلد شربت من ماءها ممكن يكون الميه ملوثه لكن ده مش عيب البلد ده عيب اللي بيدروها
عطاء من زرعه اكلت منها ممكن تكون مسرطنه من الموبيدات لكن ارجع اقول مش عيبها
فعلا الانتماء لازم يبقي موجود للبلد بعيدا عن نظام بيحكم او مشاكل كتيره بتواجها
فعلا زي ما انت قولت البلد اكبر من انها تتمثل فى اشخاص معينين واكبر من انى اكرهها علشان تصرفات متعجبنيش
انا سعيد اني شوفتك النهارده يا محمد
وتشرف المدونه في اي وقت
Post a Comment